[忽然一周633期]娱乐顶点 叶青霖评镜头下艺人 郭羡妮有心事
忽然一周 第633期 2007-09-14
喺香港，如果有女藝人話冇俾著名攝影師葉青霖影過，真係好打有限。即使要葉青霖自己講番曾經同邊個藝人影過相，恐怕連佢自己都計唔清。
畢竟係「神枱級」老行尊，俾佢由細影到大，由o靓妹變大美人嘅亦都唔少，計有張曼玉、葉童、邱淑貞、鍾楚紅、李珊珊等等等等……
今年佢出版入行三十年嘅紀念影集《把握當下葉青霖三十年》，無論新舊藝人都全力支持，甘願做佢嘅model。今次本刊就搵嚟部分影集內嘅新相片，讓葉青霖親自品評同介紹。
李珊珊清場拍攝
葉：「一直以來大家睇珊珊嘅相，都會留意佢身材，所以我亦冇改變呢個元素，不過今次想強調佢powerful嘅眼神，令人覺得佢唔再需要倚靠別人，或多或少來自珊珊同嘉樂分手，依家要再戰江湖嘅感覺。同珊珊合作超過10年，佢每次影性感相一定要求清場，連攝影助手都唔可以留低，佢話怕尷尬！」
陳法拉要求多多
葉：「我入行30年以來，都未曾遇過一個咁倔強嘅女仔，因為我知道法拉有中國舞底子，所以預備咗啲唐裝，但佢一睇見就唔鍾意，之後同事立即去買運動服，但法拉又話接受唔到件背心會露腰，最後同事又再買過。」
郭羨妮陶大宇後遺症
葉：「啱啱喺加拿大返嚟嘅郭羨妮，雖然初見面佢表現得有講有笑，但我感覺到佢有心事，唔太開心，所以喺影呢輯相時我叫佢盡量隨心，唔好收埋自己，將來睇番呢輯相，都會記得當日有過呢段經歷。」
楊思琦影到喊
葉：「露肩構思只係想大家將注意力集中喺思琦嘅表情上，拍攝時我叫佢諗啲唔開心嘢，佢諗諗吓，突然有眼淚流落嚟，咁啱俾我捕捉得到。不過係因為工作定係感情而流淚，我當然會保守秘密啦！」
鍾嘉欣輸俾楊思琦
葉：「想將鍾嘉欣塑造成傷感嘅天使，喺拍攝嗰時盡量叫佢諗啲唔開心嘅嘢，佢雖然好快喊得出，但出嚟嘅效果唔夠思琦好，所以只係揀咗呢張表情哀傷嘅相。」
朱茵忽然增高
葉：「因為拍攝角度遷就，令朱茵整個人拉高咗，影呢輯相嗰時我直頭瞓喺地下。我唔想佢好似平日碌大眼，好精靈嘅樣，相反依家『瞇』起對眼，感覺更加性感。」
徐子珊從來冇靚過
葉：「以前見過子珊做主持，偶爾喺雜誌睇到佢啲相，我從來冇覺得佢係靚女。但今次合作，子珊俾我好多驚喜，而且佢好鍾意跳HipHop舞。因為我個女嘅關係，我亦成日聽HipHop，令我哋拍攝時有好多話題。」
Trackback
你可以使用这个链接引用该篇文章 http://publishblog.blogchina.com/blog/tb.b?diaryID=6513099