壹本便利 783期 2007-01-23
國際中華小姐上星期六（20日）佛山舉行決賽，可能內地舉行關係，表演環節好有內地特色，唱京劇、打功夫，好鬼國慶文藝晚會feel。
講番賽果，一向善於谷奶搶鏡香港代表陳茵媺本來等住睇，點知決賽當晚大會竟然以黑色兩件頭泳衣決勝負，冇得騷「哥利」陳茵媺五強唔入，最後由悉尼宋熙年爆冷奪冠，雖然佢玩呼拉圈確係幾突出，不過評判就好似唔多受落，事關便姨見到評判之一郭羨妮只畀4分，再睇埋隔籬郭晉安畀5分，不過大會有五位評判，可能其餘三位好欣賞呢。
完騷後便姨搵安仔傾偈，問佢做乜咁手緊？安仔話：「唔記得啦，我……我係畀5分，不過都唔算低啦！」再問索妮點解畀咁低分，索妮初時都係死口唔認，後來問多兩問先改口話：「呀……其實4分真係唔係一個低分數，我最高都係畀6分。」嘩！十分滿分，4分叫唔低分呀，唔合格喎？乜今屆表演真係咁難睇咩？
問番冠軍宋熙年，佢話自己練三日呼拉圈：「我畀自己7至7.5分啦！」當佢知道個殘酷事實後，即時呆唔識點答，便姨明白選美都係場騷，睇得過癮就算啦，其實太深究咪盞大家尷尬！
你可以使用这个链接引用该篇文章 http://publishblog.blogchina.com/blog/tb.b?diaryID=6062499